«Balkhash Tour Fest 2025» фестивалі аясында ұйымдастырылған ақпараттық тур мазмұнды және нәтижелі форматта өтті. Іс-шараға туроператорлар, турагенттіктер, туристік бизнес өкілдері, журналистер, блогерлер, туристік пабликтердің администраторлары және басқа да мүдделі тараптар қатысты. Негізгі мақсат – Балқаш өңірінің туристік әлеуетін таныту, іскер байланыстарды нығайту, ішкі және кірме туризмді дамыту.
Тур бағдарламасына «Туризмдегі инновациялар: технология, сервис, жылжыту» атты семинар енгізіліп, онда саланың заманауи трендтері, цифрлық шешімдер және өзекті мәселелері талқыланды. Қатысушыларды Қарағанды облысының Кәсіпкерлік басқармасының басшысы Ирина Любарская құттықтап сөз сөйледі. Kazakh Tourism өкілдері стандарттау бастамаларын және «Сапа белгісі» бағдарламасын таныстырды, сондай-ақ жергілікті IT-жоба – QazEli брондау жүйесі ұсынылды.
Мәдениет басқармасының өкілдері өңірдің мәдени-тарихи әлеуеті, сакралды және мемориалдық нысандар, мәдени туризмді дамыту перспективалары туралы ақпарат берді. Қатысушылар «Балқаш» мемлекеттік емдеу-сауықтыру кешенінің жұмысымен танысып, Балқаш қалалық өлкетану музейіне барып, қаланың тарихы мен туристік мүмкіндіктері туралы мағлұмат алды.
Тур аясында қонақүй бизнесінің кәсіпкерлерімен B2B-кездесулер өткізіліп, ынтымақтастықты нығайту және туристік аймақтарды бірлесіп ілгерілету мәселелері талқыланды. Бағдарламаның қорытынды бөлігі көрікті Бектауата шатқалына жасалған сапармен түйінделіп, қонақтар үшін мәдени бағдарлама ұсынылды.